Lýsing
Tramin
Tónleikarin og framleiðarin SAKARIS gevur í hesum døgum út nýggja staklagið “Tramin”. Lagið er heldur øðrvisi enn tað sum vit kenna frá unga havnamanninum… ella hov, søgdu vit “unga” havnamanninum? Vit meintu “miðaldraða gamla gubbanum”, tí tað er júst tað ið SAKARIS er á veg at gerast, og er nýggja staklagið tískil eitt neyðarróp frá einum manni sum stendur í eini hvirlu av broytinginum og vaksandi líkasælu.
Við setningum sum “heilin bolladeiggj, sum ein smørknívur í hylstri” og “hví er høvd mítt sokkið niður í eitt runudíki?”, gremur hann seg um ein heim, ið ferðast alt ov skjótt, og ein heila sum gerst støðugt meira doyvdur og kantleysur.
“Tramin” líkist ikki vanliga 80-ara funk pop stílinum sum vit kenna frá elektrosnillingunum. Heldur ljóðar lagið sum norskur dansibands tónleikur blakaður í ein blendara við nevrotisku tónunum frá Talking Heads og Devo, sæð gjøgnum døggutar akvavitbrillur.
Útgivið:
Talgilt (Spotify, Youtube, Apple Music, v.m.)
Lurta her: https://bfan.link/tramin
